書展有感

要不是今天去了書展
也不知道香港有這麼多愛書人

人潮洶湧是最佳的證明（這個成語會再出現幾次）

一早已想像到星期六下午可以有幾多人
所以去到灣仔地鐵站
目睹A5出口人潮洶湧時
我也沒有太大的訝異

當局為疏散人潮而實行分流措施
原本最近的一條路變成半個鐘才能完成的路程
由入境處兜到華潤再兜番會展
根本似灣仔節慶巡遊
然後間唔中停一停你
十足羅湖過關
假如有遊客經過
都會驚訝香港人原來如此愛閱讀

終於到達會場
場內充滿大人細路
有人喜歡唔講唔該謝謝就撞開人向前行
有人喜歡拖gip搜購心愛書籍
對於後者行為我感到很不屑
大佬呀
你唔係唔知星期六下晝係超多人呀？
仲要當呢度係機場咁拖埋gip黎？
你係ｂｕｙｅｒ黎架？
你自由行黎架？
你住深山架？
你唔好拖BB車、推輪椅、又或拖埋隻狗黎呀？
平日拖ｇｉｐ我覺得絕對冇問題
你既然咁鐘意買書我都冇你乎
但依家係人潮洶湧既星期六下晝呀
人都已經寸步難行
仲要讓路俾gip行(有個仲帶埋買「食送」車，紅色鐵網ｏ個種！）
真係唔得你死
於是乎我同吳生可謂非常衰地見ｇｉｐ就暗踢幾下

點講都好
有咁大班書迷都算係件好事
建議主辦單位可考慮彷效連卡佛般有personal shoppers服務
安排一日俾呢班ｂｕｙｅｒｓ入貨
並派專人協助
提供專業意見
咁唔駛搞到依家咁迫

儘管我唔應該對港人存有偏見
但我真係唔相信咁多個人都係咁愛讀書
你地唔好當買書同購物一樣先得架
當我迂腐
我覺得應該俾番ｄ尊重本書
見ｄ人為左ｄ書減價就有理冇理買左先算
唉
本書都會睇你唔起的

對我而言書展既所謂特價真係唔太驚喜
根本同出面二樓書店個價差唔多
（咁當然ｐａｇｅ　ｏｎｅ呢ｄ減到八折就較例外啦）
我覺得書展最可貴之處就係可以介紹到不同書種
一ｄ坊間較少有既書籍如宗教同兒童類
趁呢個機會亮亮相
等人認識下都幾好
我始終覺得買書是件挺浪漫和詩意的事
有時無意中邂逅到
然後趁價低吸納
如此得到心頭好才是我所好
要我ｏ係場館迫到死死下咁慢慢揭本書
真係咩讀書興致都冇晒

現在的收穫只有一本實用的倉頡書
購入目標尚有龍應台的《孩子，你慢慢來》、湯禎兆的《ＡＶｘｘ》和林生那本講女人的書
呀，台灣的兒童書也好吸引（近年懶有童真地鍾情兒童書）

仲想講講胡生個頭
繼上次ｏ係新聞睇到之後
今日再ｏ係Ｃｕｐ本《讀好書》睇到
嘩胡生，你頭上ｏ個執向左微傾既毛搞到你成個Q太郎咁喎
係最新ｓｔｙｌｅ？
快ｄ整整佢啦